Home

Ballade des Dames de Temps Jadis

 Dictes-moy où, n’en quel pays,
 Est Flora la belle Rommaine;
 Archipiada ne Thaïs,
 Qui fut sa cousine germaine,
 Echo parlant quant bruyt on maine
 Dessus rivière ou sus estan,
 Qui beauté eut trop plus qu’humaine?
 Mais où sont les neiges d’antan!

 Où est la très sage Heloïs,
 Pour qui chastré et puis moyne
 Pierre Esbaillart à Sainct-Denys?
 Pour son amour eut cest essoyne
 Semblablement, où est la royne
 Qui commanda que Buridan
 Fust jetté en ung sac en Seine?
 Mais où sont les neiges d’antan!

 La royne Blanche comme ung lys.
 Qui chantoit à voix de sereine,
 Berthe au grand pied, Bietris, Alys,
 Harembuorges, qui tient le Mayne,
 Et Jehanne, la bonne Lorraine
 Qu’Anglois bruslèrent à Rouen;
 Où sont-ils, Vierge souvraine?
 Mais où sont les neiges d’antan!

 Prince, n’enquerez de sepmaine
 Où elles sont, ne de cest an,
 Que ce refrain ne vous remaine:
 Mais où sont les neiges d’antan!
François Villon [1431–after 1463]